Бухоро вилояти ҳокимлиги, Ўзбекистон Республикаси Олий Мажлиси ҳузуридаги нодавлат нотижорат ташкилотлари ҳамда фуқаролик жамиятининг бошқа институтларини қўллаб-қувватлаш жамоат фонди, Ҳаракатнинг вилоят Кенгаши муассислигидаги “Бухоро ёшлари” газетаси ҳамда Бухоро шаҳар ҳокимлиги Маданият ва спорт ишлари бўлими ҳамкорлигида Янги йил муносабати билан Бухоро шаҳридаги 32-Меҳрибонлик Уйида “Эркин фуқаролик жамияти қуриш йўлида камарбаста бўлайлик!” номли давлат гранти маблағлари асосида маданий-маърифий тадбир ўтказилди.
– Шуни фахр билан айтаманки, мен Ўзбекистон фарзандиман! Менга шундай олам-олам завқ бағишлаётган онажон юртим келажагиман. Ниятим янги йилда дунёга келажак болажонлар ота-оналари бағрида улғайишсин, дунё болаларники бўлсин!-32-Меҳрибонлик уйи тарбияланувчиси 11 ёшли Пётр Горовнинг бу сўзлари юракларни жунбушга солди.
“Болалар ота-оналари бағрида улғайишсин” дея жажжигина қалбига катта армонни тугган Пётрга ўхшаган 97 нафар болажон шу масканда таълим-тарбия олишади, меҳрибон устозлар маслаҳатида бўлишади, ўз келажаклари ва тақдирлари учун интилишади. “Кўнгилга ташриф” маданий-маърифий тадбири ҳам айнан мана шундай орзуманд болажонларга Янги йил завқини улашишга ҳисса қўшди.
“Бухоро ёшлари” газетаси қошида ташкил этилган “Парвоз” фаол жамоатчи ёшлар тарғибот гуруҳи аъзолари иштирокида саҳналаштирилган “Янги йилнинг сеҳрли соати” номли қувноқ томошалар болажонларга хуш кайфият бағишлади. Улар турли эртак қаҳрамонлари билан гўё эртаклар оламига саёҳат қилишди.
32-Меҳрибонлик Уйи тарбияланувчилари иштирокида ташкил этилган қизғин танлов ҳамда мусобақалар ҳам, айниқса, қизғин кечди. Расм чизишга иқтидорли болажонлар ўртасида ўтказилган “Тинчликсевар болажон”, ёш қаламкашлар ўртасидаги “Мушоирахонлик” ҳамда спорт ишқибозлари ўртасидаги “Соғлом бола” мусобақалари улар истеъдодларини яна бир карра қўллаб-қувватлашга сабаб бўлди.
– Шеър ёзишга жудаям қизиқаман. Устозларим шеърий машқларимни доимо кузатиб, ўз маслаҳатларини бериб боришади. Келажакда эл севган шоира бўлиб етишишни жуда-жуда орзу қиламан,- дейди қаламкаш қиз Сурайё Мустафоева.
Бири келажакда шоира, бири муҳандис, бошқаси учувчи, яна бири ҳарбий бўлишни орзу қилган болажонларнинг юз-кўзларидаги ишончни кўриб, улар қалбига шундай дадиллик, қатъият уруғини эка олган давлатимиз ғамхўрлигига шукрона айтасан, киши.
Тадбир давомида вилоятимизнинг таниқли хонандалари ижросидаги куй-қўшиқлар болажонларни рақсга чорлади.
Танлов ғолиблари ва иштирокчиларию барча болажонлар совға-салом, диплом ҳамда “Бухоро ёшлари” газетасининг эсдалик нишонлари билан тақдирланишди. Тақдирлаш жараёнида “Бухоро ёшлари” газетаси учун Таҳририят ҳисобидан 32-Меҳрибонлик Уйига 5 дона 1 йиллик обуна Сертификати топширилди.
Шундан сўнг маънавий-маърифий тадбир ташкилотчилари Ўзбекистон Республикаси Вазирлар Маҳкамасининг 2010 йил 2 августдаги 164-сонли Қарори ҳамда “Етим ва ота-она қарамоғидан маҳрум бўлган болаларни турар жойлар билан таъминлаш тўғрисида”ги Низомга асосан, Меҳрибонлик Уйида тарбияланган, айни пайтда давлатимиз томонидан уй-жой билан таъминланган ёш оилалар хонадонларига бўлишиб, байрам совғаларини улашишди.
“Кўнгилга ташриф” маънавий-маърифий тадбири болажонлар чеҳрасига ва қалбига бир лаҳза бўлса-да қувонч бахш эта олган бўлса, шубҳасиз.
Мақола Ўзбекистон Республикаси Олий Мажлиси ҳузуридаги Нодавлат-нотижорат ташкилотлари ва фуқаролик жамиятининг бошқа институтларини қўллаб-қувватлаш жамоат фонди лойиҳаси асосида тайёрланди.