Jarayon

Уюшма бўлими раиси ўзгарди: БУХОРОДА ЖУРНАЛИСТЛАР ҲАМЖИҲАТЛИГИ ЯНГИ БОСҚИЧГА КЎТАРИЛАДИ

Қалб бурчи

Бухоро асрлар оша илм, маърифат ва маданият бешиги бўлиб келган. Бу кўҳна ўлка, нафақат, шоирлару уламоларни, балки, ҳақ сўзни байроқ қилиб олган қалам аҳли-журналистларни ҳам тарбиялаган. Бухоро журналистикаси ўтмишнинг теран анъаналари билан замонавий фикр қудратини уйғун этган, қалам ва виждон қудратини бирлаштирган мактабдир.

Тарих саҳифаларига назар ташласак, Бухоро заминида етишиб чиққан кўплаб салоҳиятли ижодкорлар, журналистлар, адабиётшунослар ва илму фузалолар бу соҳанинг юксалишига беқиёс ҳисса қўшганини кўрамиз. Улар фақат янгилик тарқатмаган, балки, жамиятнинг фикрий қиёфасини шакллантирган, халқнинг дардини, юртнинг дармонини қалам орқали ифода этган.

Бухоро журналистикаси бу фақат тарих эмас, бу ҳаётнинг ўзи, ҳақиқат учун курашнинг, адолат учун овоз чиқаришнинг рамзидир. Бу соҳа ҳамиша халқ манфаатига хизмат қилган, юрт равнақи йўлида сўз қудратини қуролга айлантира олган.

Бироқ, ҳар бир соҳада бўлгани каби Бухоро журналистикаси ҳам ўзига хос синовларга, муаммоларига дуч келган. Бироқ, сўз қадрини билган бухоролик журналистлар тўсиқ ва бефарқликларни забт этиш йўлида сайъ-ҳаракатдан тўхташмаган, илгарилаш – замон билан ҳамқадам ва ҳамнафас бўлишни қалб бурчи, деб билишган. Ҳар бир соҳанинг ўз етакчиси, эзгу ва хайрли ишларга бошловчиси бўлганидек, қатор ва узоқ йиллар кўплаб шундай маънавият етакчилари билан елкама-елка туриб, қадам ташлашган.

Айни дамда ҳам Бухоро журналистикаси ўз мавқеи ва мактабига эга паллада бўй чўзмоқда. Ҳамжиҳатлик, биргаликда сайъ-ҳаракатга киришишлик Бухоро журналистикасининг мустаҳкам мақсади.

Гулшода Ибрагимова – Уюшма бўлимига раис бўлди

Гулшода Ибрагимованинг Ўзбекистон Журналистлар уюшмасининг Бухоро вилояти бўлимига раис этиб сайлангани ана шу мақсадларни янада муштарак этди. Ўзбекистон Журналистлар уюшмаси Бухоро вилоят бўлимининг навбатдаги йиғилишида иштирок этган уюшма бўлими бошқаруви аъзолари Гулшода Ибрагимованинг номзодини бир овоздан қўллаб-қувватлашди.

Йиғилишда қатнашган Ўзбекистон Журналистлар уюшмаси раиси в.б. Холмурод Салимов мамлакатимизда Президентимиз Шавкат Мирзиёев раҳбарлигида миллий журналистикамизни ривожлантириш, медиага доир қонунчиликни такомиллаштириш йўлида кенг кўламли ишлар амалга оширилаётганини алоҳида таъкидлади. Уюшма ва унинг ҳудудий бўлимлари фаолиятини бугунги кун талаби даражасида ташкил этиш, мавжуд муаммо ва камчиликларни бартараф этиш бўйича сўз юритди.

Йиғилиш кун тартибига кўра,  Уюшма Бухоро вилояти бўлими раисини сайлаш масаласи кўриб чиқилди. Иброҳимова Гулшода Амриллоевна  Ўзбекистон Журналистлар уюшмасининг вилоят бўлими раиси этиб сайланди.

Йиғилишда Бухоро вилояти ҳокимлиги Ахборот хизмати раҳбари Олим Жўраев, “Бухоронома” газетаси бош муҳаррири Шодмон Сулаймонов, “Бухоро ёшлари” газетаси муҳаррири Лайло Ҳайитова, “Қоровулбозор тонги”  газетаси муҳаррири Баҳром Солиев, “Бухоро вилояти телерадиоканали” давлат муассасаси директори Обид Шабанов ва бошқалар сўз олишди.

Маълумот учун: Гулшода Иброҳимова 1982 йилда Ғиждувон туманида туғилган. Ўзбекистон давлат жаҳон тиллари университетининг халқаро журналистика факультетини тамомлаган. Ўзбекистон журналистика  ва оммавий коммуникациялар университетининг медиаменежмент йўналиши бўйича магистратура босқичида ўқиган. У фаоолияти давомида “Осиё” телеканали мухбири, “Коинот” телеканали бош муҳаррири, “Ғиждувон ойнаи жаҳони” МЧЖ бош муҳаррири, Олий ва ўрта махсус таълими вазирлиги ҳузуридаги “Маънавият ва маърифат” маркази Интернет ва ижтимоий тармоқлар билан ишлаш бўлими журналисти, Ўзбекистон Республикаси Маданият вазирлиги матбуот хизмати Интернет ва ижтимоий тармоқлар бўйича масъул ходими, Бухоро шаҳар ҳокимлиги Ахборот хизмати раҳбари, “Микрокредитбанк”АТБ Ахборот хизмати раҳбари ўринбосари ҳамда банкнинг Бошқарув раиси Маънавий-маърифий ишлар ва Давлат тили масалалари бўйича маслаҳатчиси лавозимларида ишлаган.

Бу вазифа Гулшода Ибрагимованинг зиммасига янги Бухоро шароитида журналистикани янада ривожлантиришдек улкан масъулиятни юклайди. Соҳада адолатни мустаҳкамлаш, уни ривожлантириш ва ҳамкасблар ишончини оқлашга ундайди.

“Бу масъулият барчамизнинг умумий вазифамиздир”

Бухоро журналистикаси ана шу йўлда фидоий қалам аҳлини, ҳақ сўзнинг посбонларини бирлаштираётган қудратли минбарга айланмоқда. Шу боис, соҳа вакилларини қўллаб-қувватлаш, уларнинг овозини эшитиш, бу фақат Уюшма раисининг касбий эмас, балки, сиёсий ва маънавий бурч ҳамдир.

“Бу масъулиятни фақат биргина раҳбарнинг елкасига юклаб бўлмайди. Чунки, бу барчамизнинг умумий вазифамиз, бурчимиздир. Аввало, Бухоро журналистларининг ҳамжиҳатлиги, бир мақсад йўлида бирлашиши, ўзаро тафаккур ва ижодий ҳамкорликни янада кучайтириш уюшманинг ривожига, замонавий Бухоро журналистикасининг янги босқичга кўтарилишига хизмат қилади. Шунинг учун ҳар бир журналист ўз масъулиятини чуқур ҳис қилиб, ўз бурчини сидқидилдан адо этса, Бухоро журналистикаси мамлакат миқёсида намунага айланиши, шубҳасиздир”,-деди Обиджон Шабанов.

Маълумот учун: Шу куни Уюшма раҳбари Холмурод Салимов  уюшма аъзолигига қабул қилинган “Шофиркон овози” газетаси муҳаррири Алишер Обидов, Вобкент тумани ҳокимининг Ахборот хизмати раҳбари Шуҳрат Шароповга аъзолик гувоҳнома ва нишонларини топширди.

Og`riq nuqta

“Оталар сизга муносиб бўлсин…”

Бугун анчадан буён режа қилиб юрган, аммо имкон топа олмаётган манзилга бордим. Қамоқхонага. Ҳа, қайта ўқисангиз ҳам яна шу сўз “қамоқхона”, адашмадингиз, ўқишда давом этинг. Бироқ қўнғироқ қилиб “қаердасан”, деб сўрашганда турмада эканимни айтишга уялдим. Шу кунгача бу ерга журналист сифатида бормаганимга афсусландим.  Batafsil “Оталар сизга муносиб бўлсин…” →

Суд ҳукми

Ёпиқ суд тафсилотларини ошкор қилганлар жиноий жавобгарликка тортилади

Ёпиқ суд мажлиси маълумотлари ошкор этилишининг олди олинади. Қонун (ЎРҚ–1084-сон, 26.09.2025 й.) билан айрим қонун ҳужжатларига ўзгартириш ва қўшимчалар киритилди.

Қонун билан киритилган ўзгартиришларга кўра, ёпиқ суд мажлиси муҳокамаси маълумот ҳамда тафсилотларини суднинг рухсатисиз ошкор қилмаслик мажбурияти юклатилган шахс томонидан уларни ошкор қилганлик учун жиноий жавобгарлик белгиланди.

Киритилган қўшимчаларга кўра, ишни ёпиқ суд мажлисида кўриш учун асослар мавжуд бўлганда суд ишни ёпиқ суд мажлисида кўриш тўғрисида ажрим чиқаради.

Ажрим чиқарилганда ёпиқ суд мажлисида иштирок этаётган шахслар суд муҳокамаси маълумотларини суднинг рухсатисиз ошкор қилмаслик тўғрисида огоҳлантирилиб, улардан тилхат олинади.

Тилхатда мазкур мажбуриятни бузганлик учун Жиноят кодексининг 239-моддасига мувофиқ жавобгарлик ҳақидаги огоҳлантириш ҳам акс эттирилади.

Қонун расмий эълон қилинган кундан эътиборан кучга киради.

 

 

Haftalik davom etmoqda

Бухорода халқаро меҳнат ҳамкорлиги: Европага йўл очилди

Маълумки, бугунги кунда меҳнат миграцияси – жаҳон миқёсида иқтисодий тараққиётни таъминлашда муҳим стратегик омилга айланган. Словениянинг Бандлик хизмати бош директори ва Дунё давлат бандлик хизматлари ассоциацияси президенти Грета Метка Барбо Шкербич хонимнинг Бухорога расмий ташрифи ана шу долзарб масала юзасидан муҳим қарорга сабаб бўлди.

Бухоро вилоят ҳокимлиги ахборот хизматининг билдиришича, жорий йил 20 май куни Ўзбекистон президентининг Словения президенти билан учрашувида меҳнат миграцияси масаласида сўз бориб, икки давлат раҳбари ўртасида меҳнат миграцияси йўналишида ўзаро ҳамкорлик истиқболлари муҳокама қилинган.

Ушбу ҳамкорлик доирасида Бухоро ҳокими ҳамда Словения ассоциацияси президенти ўртасидаги халқаро мулоқот сифат ва стандартлар асосида ишчи кучини экспорт қилишга қаратилган. Словения бозори учун малакали ва рақобатбардош кадрлар тайёрлаш, меҳнат миграциясини шаффоф ва тизимли ташкил этиш масалалари ҳақида сўз борган.

«Касбий тайёргарликда словен стандартларини жорий этиш ва таълим тизимини мослаштириш юзасидан ўзаро ҳамкорликка қўл чўзилди. Мамлакатимиз президенти “Йўл харитаси” доирасида Бухорода ғСловения талабларига мос касбий ўқув курслари ташкил этилиши белгиланди. Бу Европа бозори учун етук мутахассислар тайёрлашга имкон яратади. Тажриба, рақамлаштириш ва ҳамкорликнинг янги босқичида турган эканмиз, словен иш берувчиларининг аниқ буюртмалари асосида ўқув дастурларини ишлаб чиқиш, тил ва касбий кўникмаларга эга мутахассисларни тайёрлаш диққат марказимизда бўлади. Бизни хурсанд қилгани – Грета Метка Барбо Шкербинч хоним Словения иш берувчилари номидан Бухорода тайёрланган, тил билими ва касбий кўникмага эга бўлган мутахассисларни ишга қабул қилишга тайёр эканини маълум қилди. Европага йўл очилгани иқтисодий барқарорлик сари қадамдир»,-деди Вазирлар Маҳкамаси ҳузуридаги Миграция агентлиги Бухоро вилояти ҳудудий вакиллиги раҳбари Нозима Холиқова.

Ушбу ҳамкорлик икки халқ ўртасида ишонч, ҳамжиҳатлик ва маданий яқинлашувга замин яратибгина қолмай, Бухорода ишсизликни қисқартириш, ёшларни хорижда қонуний ва муносиб шароитда ишлаш имконияти билан таъминлашга хизмат қилади.

Суд ҳукми

Алиментдан бўйин товлаган отага ҳукм ўқилди

Болалар — жамиятнинг энг катта бойлиги, уларнинг соғлом ўсиши ва муносиб таъминот топиши эса аввало ота-онанинг бурчи. Бироқ ҳаётда бу масъулиятдан бўйин товлаб, фарзандларини етим қилмаган, аммо етимдек қўйиб қўяётган оталар ҳам йўқ эмас.     Жиноят ишлари бўйича Бухоро шаҳар судида фарзандларини моддий таъминлашдан бош тортган фуқаро У. Э. га нисбатан ҳукм эълон қилинди.

Маълум бўлишича, У. Э. уч нафар вояга етмаган фарзандларини моддий таъминлаб бориши ҳақида суд қароридан хабардор бўлганига қарамай, узоқ муддат алимент тўламай келган.

Суд маълумотларига кўра, у 2021 йилдан буён фарзандлари таъминоти учун иш ҳақининг ярмини алимент сифатида тўлаб бориши шарт қилинган. Бироқ Эшонов ўз мажбуриятини бажармаган, 2024 йилда маъмурий қамоққа тортилганидан кейин ҳам вазият ўзгармаган. Натижада унинг қарзи 83 миллион 709 минг сўмга етган.

Суд жараёнида айбланувчи қилмишидан пушаймонлигини билдирган ва моддий шароити оғирлигини айтиб енгиллик сўраган. Бироқ суд унинг айбини тўлиқ исботланган деб топди.

Шу боис, Бухоро шаҳар суди ҳукмига кўра, У. Э. Ўзбекистон Республикаси ЖК 122-моддаси 1-қисми асосида 1 йил озодликдан маҳрум қилиш жазосига ҳукм қилинди. Шунингдек, ундан жабрланувчи Ш. И. фойдасига тўпланган қарз — 83 миллион 709 минг сўм алимент мажбурий тартибда ундирилади.

Суднинг ушбу қарори яна бир бор шуни кўрсатадики, фарзанд таъминотидан бўйин товлаш на ахлоқан, на қонунан кечирилади. Ота-онанинг энг катта масъулияти — фарзандга меҳр ва моддий кўмак беришдир. Акс ҳолда, қонун олдида жавоб бериш муқаррар.

Феруз Шаропов,

Бухоро вилояти суди ахборот хизмати раҳбари

Nigoh

МАРКАЗИЙ ОСИЁ:тинчлик, барқарор ҳаёт ва фаровонлик диёри!

Бугун дунёда тўғридан тўғри денгизга чиқиш имконияти бўлмаган 32 давлат мавжуд. Буларнинг 16 таси Африка, 10 таси Осиё, 4 таси Европа, яна 2 таси Лотин Америкасида жойлашган. Ушбу давлатларда дунё аҳолисининг 7 фоизи, яъни 500 миллиондан ортиқ киши истиқомат қилади. Ўзбекистон ҳам мана шу давлатлар рўйхатида.

Давлатимиз Раҳбари Шавкат Мирзиёев Туркманистон Президенти Сердар Бердимуҳамедовнинг таклифига биноан 4-5 август куни БМТнинг “Денгизга чиқиш имкони бўлмаган ривожланаётган мамлакатлар бўйича учинчи конференцияси”да иштирок этди. Ушбу конференциядаги иштирок Ўзбекистоннинг Марказий Осиёдаги лидерлик ўрнини янада мустаҳкамлаш, ривожланиш йўлидаги муҳим қадамларидан бири бўлди.

Айниқса, бой тарихий тажриба, қардошлик ва ўзаро ҳурмат анъаналарига асосланган Ўзбекистон-Туркманистон стратегик шериклик, азалий қўшни ва биродар халқ раҳбарларининг учрашувлари ҳар галгидек юксак манфаатлар, эзгу мақсадларга сабаб бўлди. Шу маънода “Биз учун Туркманистон – минтақадаги ишончли ва муҳим ҳамкор. Бизнинг кенг кўламли ҳамкорликни янада ривожлантириш борасидаги интилишимиз қатъий, энг яқин қўшнимиз билан стратегик шериклик муносабатларини ҳар томонлама мустаҳкамлаш ниятидамиз”, дея бежизга айтмаган Президентимиз Шавкат Мирзиёев.

Ўзбек-туркман муносабатлари ҳақида

Тарихдан аёнки, туркманлар Ўзбекистон ҳудудида қадим замонлардан буён яшаб келадилар. Улар ўзларининг кўп асрлик маданияти ва анъаналарини сақлаган ҳолда Ўзбекистоннинг кўп миллатли ягона оиласига уйғун тарзда қўшилиб кетганлар. Туркманларни ўзбек халқи билан тили, маданият, урф-одат ва тарихий илдизларининг яқинлиги, шунингдек, иккала халқ учун умумий бўлган эпос, афсона ва халқ достонлари бирлаштиради.

Давлат статистика қўмитасининг расмий маълумотига кўра, мамлакатимизда 1990 йилда 123 711 нафар, 2000 йилда 144 601, 2019 йилда 198 797 нафар ва 2022 йил ҳолатида эса 200 000дан ортиқ туркман миллатига мансуб фуқаролар истиқомат қилаётир.

130дан ортиқ миллат ва элатни “Ўзбекистон – умумий уйимиз” шиори остида бирлаштириб келаётган жонажон юртимизда икки юз мингдан ортиқ туркманлар ўз миллий маданиятлари, тили, анъаналари ва урф-одатларини асраш ҳамда ривожлантириш бўйича конституциявий ҳуқуқларини 2001 йил 7 май куни ташкил қилинган Республика Туркман маданий маркази орқали амалга ошириб келмоқда. Айтиш ўринлики, бугунги кунга келиб ушбу марказнинг таркибий тузилмаси ҳисобланган Қорақалпоғистон Республикаси Туркман маданий маркази, Бухоро, Қашқадарё, Сурхондарё, Тошкент вилоятлари ва Тошкент шаҳридаги ҳудудий бўлинмалари фаолият юритиб келмоқда.

Бағрикенг диёримизда миллат ва элат вакиллари сингари туркман миллатига мансуб фуқаролар ҳам юртимизнинг муҳим саналари: “Наврўз”, “Мустақиллик куни”, “Конституция куни” сингари умумхалқ байрамларида фаол қатнашадилар. Ушбу миллатнинг тарихий шахслари, алломалари жумладан, туркман тилининг асосчиси, ХVIII асрда яшаб ўтган буюк шоир ва аллома Маҳтумқули, туркман мумтоз шоири Молланапес Қодирберди ўғли каби инсонлар хотирасига бағишланган тадбирлар ўтказилиши анъанага айланган. Шунингдек, туркман халқи буюк шахслари, шоиру арбобларининг ўзбек тилига таржима қилинган китобларининг тақдимоти ўтказилади, туркман санъати ва халқ ҳунармандчилиги намуналари намойиш қилинади. Айтиш керакки, юртимизнинг кўпгина маҳаллалари, кўчалари, истироҳат боғлари, муассасаларига туркман халқининг шаҳар/туманлари, таниқли шахслари, арбоблари, шоирларининг масалан, “Ашхабот” истироҳат боғи, “Махтумқули” номидаги маҳалла, кўчалари номи берилган. Бу эса, бағрикенг Ўзбекистонда миллатлараро тотувлик ғоясини кенг қулоч очишига, “Инсон қадри учун” умумхалқ ҳаракати миллатидан қатъий назар тенг ва кенг амалда йўлга қўйилганининг ёрқин ифодасидир.

Ўзаро ҳурмат, ишонч ва манфаатли ҳамкорлик тамойилларига асосланган ўзбек-туркман муносабатларининг ривожланишига кўмаклашиш баробарида марказлар жамоатчилиги томонидан ҳар йили ўзбек-туркман дўстлиги кечалари ташкил қилинади. Бугунги кунда миллий маданият марказлар ўқитиш туркман тилида олиб бориладиган 40 дан ортиқ мактабларга кўмаклашадилар, ушбу мактаблар учун мутахассислар Қорақалпоқ давлат университетининг туркман филологияси факультетида, Беруний шаҳридаги Педагогика коллежида тайёрланади. Бундан ташқари, республикада туркман тилида бир қатор газета ва журналлар чоп этилади. Ёшлар билан ишлаш дастурлари доирасида марказлар қошида ҳаваскор бадиий жамоалар ташкил этилган бўлиб, улар орасида энг машҳури Қорақалпоғистон Туркман маданий маркази қошида фаолият юритувчи “Орзу” ансамбли ҳисобланади. Ушбу марказда “Мекан” газетаси ҳам чоп этилади.

 

Тинч ва фаровон ҳаёт сари…

Сўнги саккиз йилда дунё нигоҳи Ўзбекистонга қаратилди. Бунинг ягона сабаби Муҳтарам Президентимиз Шавкат Мирзиёевнинг кучли иродаси туфайли Марказий Осиё давлатлари, айниқса, қўшни мамлкатлар билан “яхши қўшничилик”, дўстона муносабатларни ўрнатиш, тинчлик ва фаровон ҳаёт сари бирлашиш, биргаликда минтақани ривожланган мамлакатларга айлантириш каби улуғвор мақсадларни интилишда кузатиш, кўриш мумкин.

Юртимиз Раҳбарининг бу борадаги саъй ҳаракат натижаларини қайси мамлакатгага ташриф буюрмасин, юксак минбарлардан туриб давлат раҳбарлари эътироф этаётганида ёки муносиб даражадаги олий орденлар, нишонлар билан тақдирлаш жараёнларида кўриб гувоҳи бўляпмиз. Қозоғистоннинг “Олтин қиран” ва “Дўстлик”, Қирғизистоннинг “Данакер”, Тожикистоннинг “Зарринтож”, Россиянинг Александр Невский, Франция Фахрий легиони, Туркиянинг “Республика” орденлари, Туркий дунёнинг олий ордени, МДҲ фахрий нишони, Марказий Осиё давлатлари раҳбарларининг фахрий нишони ва бошқалар шулар жумласидан.

БМТ конференцияси доирасида Президент Шавкат Мирзиёев Туркманистоннинг “Ҳамкорликни ривожлантиришга қўшган ҳиссаси учун” ордени билан тақдирланди. Жорий йилда Гурбангули Бердимуҳамедовга Ўзбекистоннинг олий мукофоти – “Олий даражали Дўстлик” ордени топширилган эди. Бу ҳам икки давлат ўртасидаги ҳурматнинг юксак даражасини англатади.

Тантанали маросимда “Ушбу мукофотни Ўзбекистон ва унинг кўп миллатли халқига алоҳида эътибор ва ҳурмат, Марказий Осиё минтақасида дўстлик, яхши қўшничилик, ўзаро ишонч ва шериклик муносабатларини мустаҳкамлаш борасидаги умумий саъй-ҳаракатларимизнинг эътирофи сифатида қабул қиламан”, – деди Давлатимиз Раҳбари.

Шунингдек, Ўзбекистон етакчиси Туркман халқининг миллий етакчиси, Туркманистон Халқ Маслаҳати Раиси Гурбангули Бердимуҳамедов ва минтақанинг барча давлатлари раҳбарлари Марказий Осиёда ҳамкорликни илгари суришга улкан ҳисса қўшаётганини алоҳида қайд этди. Бугун бутун халқаро ҳамжамият минтақавий шериклик ва ўзликнинг янги моделини барпо этишдаги умумий муваффақиятларимизни эътироф этаётгани таъкидлади.

Шу ўринда эсга олиш муҳимки, 2022 йил октябрдаги ташрифда Президентимизга Туркманистон давлат университетининг Фахрий профессори унвони берилгани, Ашхобод шаҳрида «Тошкент» боғи очилгани, «Хоразм – Тошовуз» чегараолди савдо маркази қурилиши бошлангани ташрифнинг муҳим воқеаси бўлган эди.

Турманистон республикасига ташриф ва “БМТнинг Денгизга чиқиш имкони бўлмаган ривожланаётган мамлакатлар бўйича учинчи конференцияси” саломоғи жиҳатидан жуда катта мақсадлар ва натижаларга эришилди. Жумладан: икки мамлакат ўртасида Стратегик шерикликни чуқурлаштириш тўғрисида декларация имзоланди. Шунингдек, ҳамкорликнинг турли йўналишлари бўйича ўндан ортиқ ҳужжат қабул қилинди.

Айтиш ўринлики, ушбу конференция минтақавий ўзига хослик ва маданий ранг-барангликнинг навбатдаги намунаси сифатида ўзаро англашувни мустаҳкамлашга ҳамда Марказий Осиёни тинчлик, барқарорлик ва фаровонлик макони сифатида намоён этишда муҳим қадам бўлди. Унинг доирасида қабул қилинган Аваза декларациясида белгиланган чора-тадбирлар рўёбга чиқиши Марказий Осиё давлатларининг ўзаро интеграциясини кучайтириш, дўстлик, қардошлик ришталарини янада мустаҳкамлаш, денгизга чиқиш имкони бўлмаган ривожланаётган мамлакатлар учун янги ва ёруғ истиқболларни очишга хизмат қилади. Умуман олганда, Президентимизнинг ушбу амалий ташрифи Ўзбекистон-Туркманистон муносабатлари ривожига янги суръат бағишлаши билан бирга давлатларимиз ўртасидаги яқин ҳамкорлик, қон-қардошлик, яхши қўшничилик алоқаларининг ўзига хос ёрқин ифодаси бўлди.

Зеро, Туркман халқининг миллий етакчиси, Халқ Маслаҳати Раиси Гурбангули Бердимуҳамедов Туркманистонда шаклланган протокол тартиб-қоидаларидан четга чиқиб, Президентимизни аэропортда шахсан кузатиб қўйгани ҳам ўзаро ҳурматга асосланган самимий ва дўстона муносабатларимиз, халқларимиз ўртасидаги чинакам қардошлик ришталарининг бебаҳо намунасидир.

Ўзбекистон Республикаси давлат мустақиллигининг

34 йиллигининг “Ватан учун, миллат учун, халқ учун” бош ғоясига ҳамоҳанг олий мақсадларимизга уланган бу ташриф халқимиз тинчлиги, фаровонлигини таъминлаш ҳамда миллатлараро тотувлик ва бағрикенглик тамойилларини янада намоён этиш, асосийси, халқлар ўртасидаги орзу мақсадларни рўёбга чиқаришга замин бўлади.

 

Азизбек АМОНОВ,

Бухоро давлат университети Ёшларни маънавий юксалишига кўмаклашиш депаратменти бошлиғи, доцент