Салом менинг қадрдоним, жигарим, дўстим –Акажоним! Хизмат сафари билан қийналмаяпсизми?   Ватанимизга астойдил хизмат қиляпсизми?

Акажон! Сизга соғинч хатини йўллаяпман. Сизни жудаям  соғиндик. Сиз бўлганингизда икковимиз нуқул жанжаллашардик. Кейин бир –биримизга ёрдам берардик, мен тушунмаган нарсани сиз, сиз тушунмаган нарсани мен билар эдим. Биргалашиб ишлар қилардик. Ота –онамизга ёрдам берардик. Сиз менга насиҳатлар берардингиз. Мен изланиб, интилиб, билим олиб, берган насиҳатларингизни оқлайман. Келажакда, албатта, комил инсон бўлиб етишаман.

Акажон! Сизнинг ўрнингизни ҳеч ким босолмаяпти. Одамнинг қадри унинг йўқлигида билинар экан. Сизни ҳаммадан кўпрок мен соғиндим, акажон! Энди сизни ҳечам ҳафа қилмайман.

Биламан, сиз ҳозир Ватанимизнинг ҳимоясига шайлангансиз. Албатта, мен ҳам сиз каби Ватан ҳимоячиси бўламан. Ватанимга, элимга, юртимга, ота –онамга хизмат қиламан. Ахир Ватанга муносиб фарзанд бўлиш ҳар бир йигитнинг, ҳаттоки, қизларнинг инсоний бурчи ҳисобланади. Юртимиздан буюк, мард, жасур Алпомиш, Жалолиддин Мангуберди, Амир Темур бобомиздек аждодларимиз етишиб чиқишган. Сиз ҳам улар ортидан бориб, Ватан ҳимоячиси бўлдингиз. Мактабда, коллежда аъло баҳоларда ўқиганлигингиз, кўплаб танловларда қатнашганингиз, кўпларнинг ҳурматига сазовор бўлганингиз сабабли мана шундай гўзал бир Наманганда хизмат қиляпсиз.

Мен ҳам сизнинг изингиздан бормоқдаман. 2016 йилда Санъат коллежини битириб, Тошкент шаҳридаги санъат ва маданият институтига ўқишга топшираман.  Ҳа, айтганча! Яқинда сизни телевизордан кўрсатишди. Ана шундай чиройли, гўзал, тоғ ёнбағирларида хизмат қилаётганингизни кўриб, ота –онамизнинг, буви –бобомизнинг кўзларидан ёш оқиб кетди. Улар яна бир карра сиз билан фахрландилар. Мен сизни кўриб, Ватан ҳимоячиси бўлиш орзуим янада ортди. Ҳа, юртга, Ватанга хизмат қилиш олий шараф, қандай бахт!

Акажон! Сизни мустақил Ўзбекистонимиз Қуролли Кучларининг ташкил топганлиги ҳамда Ватан ҳимоячилари куни билан чин юракдан муборакбод этаман. Тинчлигимизга посбонлик қилишдек шарафга муяссар бўлганингиздан бахтлиман. Келгуси ишларингизда сизга сиҳат –саломатлик, узоқ –умр, омадлар ва зафарлар  тилаб қоламан. Сизни барчамиз  соғиниб қоламиз!

Амриддин ЗАЙНИЕВ