Бухоро ёшлар марказида ўтказилган “Ёш китобхон” танлови вилоят босқичининг 10-14 ёшлилар ўртасидаги баҳсларида шофирконлик иштирокчи биринчи ўринга даъвогарлик қилиб, аппеляцияга берди. Бу ҳақда “Ёш китобхон” танловининг вилоят босқичи ҳакамлар ҳайъати аъзоси Акбар Рустамов маълум қилди.

10-14 ёш тоифасида бўлиб ўтган мазкур танловда 15158 нафар ёшлар орасидан сараланган 13 нафар ёш китобхон 2 та шарт бўйича ўзаро беллашишган. “Буюк мутафаккир ва адиб” ҳамда “Бадиий асарлар билимдони” шартлари бўйича ўтказилган тест ва суҳбатлар якунлангач, ўринлар эълон қилинган.

Бироқ, танловда иккинчи ўринни эгаллаган шофирконлик иштирокчи Маҳбуба Сайфуллаева ҳакамлар ҳайъати баҳосидан норози бўлиб, аппеляцияга берган. Танловга жалб этилган экспертлар гуруҳи ва ҳакамлар томонидан аппеляцияга берган иштирокчи билими қайта синовдан ўтказилган.

Ушбу жараёнда ҳам Маҳбуба Сайфуллаева билим ва зукколикда “Ёш китобхон” танловининг вилоят босқичида ёш тоифасида 1-ўринни қўлга киритган Бухоро шаҳри вакили Дурдона Жамоловадан устун келолмаган. Маҳбуба Сайфуллаева иккинчи уринишда ҳам иккинчи ўринда қолган. Танловнинг  учинчи ўрни эса ғиждувонлик Мунира Рустамова ҳамда қоракўллик Шаҳризода Тўймуродовага берилган.

“Ёшлар ўртасида китоб мутолааси ва китобхонлик маданиятини ошириш, уларнинг интеллектуал салоҳияти ва маънавий савиясини юксалтиришга қаратилган “Ёш китобхон” танловининг Бухоро вилоят босқичи 22-23 ноябрь кунлари бўлиб ўтди.

Танловнинг 15-19 ёш тоифаси ўртасидаги беллашувлари ҳам қизғин ва мунозарали кечди.  “Буюк мутафаккир ва адиб” ҳамда “Бадиий асарлар билимдони” шартлари бўйича беллашган иштирокчилар орасидан ғолиблар сараланди.

Бухоро шаҳридан Бахриддин Рафиқов 170.3 балл билан биринчи ўринни, 162.6 балл билан Наргиза Шарипова иккинчи ўринни ҳамда 151.6 балл билан Озода Раупова учинчи ўринни қўлга киритди. 20-30 ёш тоифаси бўйича ўтказилган баҳсларда эса биринчи ўринга Шофиркон туманидан қатнашган Саломат Субҳонова лойиқ топилди.

Иккинчи ўринни қоракўллик Марҳабо Хайруллаева қўлга киритган бўлса, жондорлик Муроджон Қурбонов учинчи ўринни эгаллади. Барча ғолиблар қимматбаҳо совринларга эга бўлишди”,-деди ёшлар иттифоқи Бухоро вилояти Кенгаши раиси ўринбосари Суҳроб Нуров