Бухоро вилоят Хотин-қизлар қўмитаси ташаббуси билан Бухоро ёшлар марказида “Ҳоким ва фаол аёллар учрашуви”нинг ташкил этилиши улкан имкониятларга йўл очди, дея оламиз.

Бугунги кунда жамиятда аёллар фаоллигини кучайтириш, уларнинг ташаббусларини қўллаб-қувватлаш, ҳақ-ҳуқуқларини ҳимоялаш каби қатор масалаларда кенг кўламли ишлар амалга оширилаётганига қарамасдан, кам таъминланган ва ногиронлиги бор, шунингдек, ногирон фарзанд ўстираётган, турмуш шароити оғир бўлган аёллар билан ишлаш, уларнинг имкониятларига йўл очиш, бошпанага муҳтож оилаларни уй-жой билан таъминлаш, касб-ҳунар эгаси бўлмаган аёлларни ҳунарга ўргатиш, тадбиркорликка ноанъанавий касб-ҳунарга бўлган кўникмаларини шакллантириш, улар учун иш ўринлари яратиш биринчи тўсиқ бўлиб турганлиги борасида сўз юритилди.

– Оилалар мустаҳкамлиги, жамият равнақи, юрт тараққиёти елкасида филдек юкни ортган, жамиятимиз устуни бўлган муҳтарама аёлларимиз билан боғлиқ. Ушбу масалалар ҳал этилмас экан, жамиятнинг бошқа ижтимоий масалаларини ҳал этиш қийин,-дея таъкидлади вилоят ҳокими ўз сўзида.

Учрашувда, айниқса, тадбиркор аёлларнинг ижтимоий ҳаётдаги фаоллигини ошириш, ҳар ишда пешқадам хотин-қизларни давлат мукофотларига тавсия этиш, раҳбар лавозимларга кўтариш каби масалалари ҳам ўртага ташланди.

Сўзга чиққан фаол ва ташаббускор аёллар ўз фикр ва мулоҳазалари, теран қарашларини бирма-бир ифода этишди. Вилоятимизнинг иқтисодий фаровонлигини оширишга қаратилган таклифларни ўртага ташлашар экан, шариф шаҳарнинг бугуни ва эртаси учун камарбаста бўлишга шай эканликларини намоён этишди.

Учрашувда турли соҳаларда фаолият кўрсатаётган хотин-қизларни ташвишлантириб келаётган ўттиздан ортиқ муаммоларни бартараф этиш чоралари белгиланди. Кўплаб масалалар ўз жойида ҳал этилди. Бу, албатта, мамлакатимизда аёлларга бўлган эҳтиромнинг юксак даражада эканлигини яна бир карра исботлади.

Ҳар ойнинг биринчи шанба куни “Ҳоким ва фаол аёллар учрашуви” этиб белгиланганлиги эса иштирокчилар томонидан ғоятда кўтаринки руҳда қарши олинди.

Ўз мухбиримиз