Меҳр тафти улашиб…

Меҳр-мурувват тафти қуёшдек иссиқ. Айниқса, шу тафт кемтик кўнгилли кишиларга улашилса,  унинг қайноқлиги янада сезиларли бўлади.  Ёшлар иттифоқи Олот тумани Кенгаши томонидан олиб борилган ишлар ана шу тафтга қиёс.

Тумандаги “Қумкашон” маҳалла фуқаролар йиғинидаги Қумкашон қишлоғи аҳли ёшлар ташкилоти фаолларининг сайъ-ҳаракатларидан миннатдор эканлигини билдиришди.

Қумкашонлик 2-гуруҳ ногирони Аҳмед ака Қорёғдиев узоқ йиллардан буён орттирма хасталик билан оғриб келади.  Шу бетобликда ҳам далани севгани, ерга меҳр қўйгани учунми, бировдан кўмак кутмаган. Ҳеч қачон ўз дардини дунё қилмаган. Бироқ, йиллар сели унинг вужудини аста-секин забт эта бошлади.

  • Инсон умри бир япроқдек экан. Ёшликда дардни қанчалик ортга суриб, уни енгишга ҳаракат қилсанг, кексалик барибир, ўз ҳукмини ўтказар экан. Ерга, дарахтларга, гулу яшилликларга бўлган меҳрим балки мендан хасталикни узоқ йиллар беркитиб келгандир. Аммо, бугун ёшларнинг шижоати, менга кўмаги хасталигимни бироз бўлса-да, унутишимга туртки бўлди. Ҳолимдан хабар олиб, томорқаю, дарахтзорларимни обод этишди. Ёшларнинг борига шукур. Чарчашмасин!-дейди Аҳмед ака.

Олот туман Кенгаши ҳамда туман сардорлари томонидан амалга оширилаётган “Меҳр тафти улашиб” лойиҳаси Аҳмед ака сингари кўплаб кўнгли кемтик инсонлар қалбини нурафшон этмоқда.

Ҳамро Қўзиев,

Ёшлар иттифоқи Олот туман Кенгаши бош мутахассиси.