Бухоро шаҳридаги “Лидер Агро Израил” масъулияти чекланган жамиятига тель-авивлик ишбилармонлар томонидан 17 миллиард сўмлик инвестиция киритилди. Бу ҳақда Бухоро вилоят инвестициялар бўйича бош бошқарма бошлиғи Ҳаёт Давлатов маълум қилди.

“Бухоро шаҳрида транспорт хизмати кўрсатишга ихтисослашган собиқ “Бухоро КамАЗ” автомаркази бозор иқтисоди талабларига жавоб бера олмагач, ўз иш фаолиятини тўхтатган эди. Шу сабабдан ушбу бино кўп йиллар мобайнида бўш туриб қолган эди.  Ушбу бўш турган бинони “ноль” харид қийматида сотиш бўйича Бухоро вилояти ҳокими бошчилигида ҳудудий танлов комиссияси тузилди. 2018 йилнинг сентябрь ойидан бошлаб ушбу объектда ишлаб чиқаришни ташкил этиш хоҳишини билдирган кўплаб тадбиркорларнинг бизнес лойиҳалари кўриб чиқилди. Бир неча даъвогарлар орасида тель-авивлик ишбилармоннинг таклифи маъқулланди. Инвестор томонидан “Лидер Агро Израил” масъулияти чекланган жамиятига 17 миллиард сўмлик инвестиция киритилди. Бинодан яхлит ҳолда фойдаланиш ва унда замонавий иссиқхона конструкциялари, яъни мосламаларини ишлаб чиқариш корхонасини ташкил этиш мақсадида ноль қийматда берилди”,-деди Ҳаёт Давлатов.

Инвестиция мажбуриятига кўра, корхонани жорий йилнинг март ойи охирида ишга тушириш кўзда тутилган. Корхонада 84 нафар ишчи-мутахассиснинг бандлиги таъминланган.

“Янги йил бошидан цехларимизда технологик ускуналарни ўрнатишга киришилди,-дейди масъулияти чекланган жамият директори Яир Абоев,- бир неча қисмдан иборат мажмуани ишлаб чиқаришга мослаштириш бўйича реконструкция ва қайта қуриш ишлари олиб борилмоқда. Бунёдкорлик ишлари белгиланган муддатда тугатилади. Демак, иссиқхона конструкцияларини катта маблағ сарфлаб, хориждан харид қилишга ҳожат қолмайди. Бу эса маҳсулот таннархи ошишининг ҳам олдини олади”.

Бухорода иссиқхона конструкцияларини ишлаб чиқаришнинг йўлга қўйилгани “Бухоро агро” эркин иқтисодий зонаси томонидан амалга ошириладиган лойиҳалар кўламини янада кенгайтиради. Айни пайтда замонавий иссиқхоналарни барпо этиш учун зарур бўлган конструкцияларга талаб катта.