ФАОЛ, ЗУККО ВА БИЛИМДОН

Бухорода “Энг намунали Сардорлар Кенгаши” кўрик-танлови бўлиб ўтди.

Маълумки,  барча таълим муассасаларида ташкилотнинг энг қуйи бўғини — “Камалак” болалар ташкилотининг мактаб Сардорлар Кенгашидир. Бугунги кунда мамлакатимиз миқёсида 1 млн. 960 минг 2 та Сардорлар Кенгаши мавжуд бўлиб, Кенгаш аъзоларининг сони 3,5 млн. нафарни ташкил этади. Бу эса ҳар бир туман, шаҳарда турли йўналишларда 18 нафардан Сардорлар Кенгаши фаолият олиб бораётганини кўрсатади. 

Ташкилот фаолиятини янада такомиллаштириш, Сардорлар Кенгаши томонидан олиб борилаётган ижтимоий изланишларни қўллаб-қувватлаш ва келажакда уларнинг мамлакатимиз тараққиётига ҳисса қўшадиган етук кадр бўлиб етишларига кўмаклашиш мақсадига қаратилган “Энг намунали  Сардорлар Кенгаши” кўрик-танловининг республика босқичи Бухорода бўлиб ўтди.  Мамлакатимизнинг Қорақалпоғистон республикаси, Тошкент шаҳри ва вилоятларидан ташриф буюрган иштирокчи болалар байрамона безатилган Бухоро Мусиқали драма театрида тўпланишди.

Сардорлар Кенгашининг бетакрор кўргазмалари билан безатилган театр саҳнаси иштирокчи ўғил-қизлар билан янада чирой очди. Нигоҳларида ҳайрат ва ҳаяжон порлаган 252 нафар иштирокчи замонавий ва миллий кўринишдаги кийимлар билан бир мақсад: ғалаба ва дўстлик устуворлиги ниятида саф тортишди.

“Бу бизнинг фаолият” дея номланган илк шартга кўра, жамоалар кейинги ўқув йилида амалга оширилаётган ишлари ва фаолиятларини бадиий чиқишлар орқали таништиришди. Сурхондарёнинг “Эксклюзив”, Жиззахнинг “Иттифоқ юлдузлари” жамоаси тайёргарликни анча шижоат билан ўтказгани биринчи шартдаёқ кўзга ташланган бўлса, Навоийнинг “Бугуннинг ёшлари”, Андижоннинг “Истиқлол фарзандлари” жамоаси эса илк шартда ўзларини кўрсата олишмади. Худди шунингдек, Тошкент шаҳрининг “Келажак ёшлари” жамоаси 37 балл билан кифояланди.

Бухоронинг “Энг, самый, very”, Самарқанд вилоятининг “Келажак бунёдкорлари”, Қорақалпоғистон Республикасининг “Ayden keleshek” жамоалари ўзига хос янгича ёндошув билан чиқишлари, шунингдек, бетакрор миллий ва нақшинкор декоратив кўргазмалар ва иштирокчи Сардорларнинг жўшқинликлари олқишлар остида кутиб олинди.

“Бизнинг имкониятларимиз” деб номланган иккинчи шартга кўра, иштирокчи жамоалар болалар орасида мавжуд муаммоларга ечимни ўз янги лойиҳалари билан топишлари лозим эди. Илк шартда бироз оқсаган “Бугуннинг ёшлари” иккинчи шартда анча устун келди. Китобхонликни тарғиб этиш бўйича тақдим этган лойиҳалари ҳакамлар томонидан муносиб баҳоланди. “Табиат бизнинг онамиз, биз уни доим севамиз!” лойиҳасини тақдим этган Наманганнинг “Ўзбекистон ёшлари” ҳам диққатга сазовор бўлди. Фарғонанинг “Келажак бунёдкорлари” жамоаси томонидан “Китоб потранажи” лойиҳасини мамлакат бўйлаб тарғиботини кучайтириш муҳим аҳамият касб этиши билдирилди.

Айтиш жоизки, ҳар бир тадбир, кўрик-танлов ва беллашувлар натижаси тайёргарлик жараёнларининг қандай кечгани билан ўлчанади. Шу маънода, иккинчи шартда жамоалар томонидан тақдим этилган, деярли, барча лойиҳалар ўз янгилиги, кўлами, ижтимоий ахамияти, уни амалга ошириш тизими, шарт-шароитга мослиги, шунингдек, лойиҳанинг иштирокчи томонидан баён этилиш маҳорати каби муҳим жиҳатларга эътибор берилгани, жамоалар пешқадамлигини таъминлашда муносиб ҳисса қўша олди.

“Интеллектуал ринг” шартида иштирокчиларнинг жамоаларнинг ижтимоий, сиёсий, ҳуқуқий, маънавий-маърифий билимлари синовдан ўтказилди. Бунга кўра, улар ҳакамлар томонидан тақдим этилган 10 та саволга жавоб беришди.  Шартга ақлий баркамоллик ила киришган жамоалар билими юқори баҳоланди.

– “Энг намунали  Сардорлар Кенгаши” кўрик-танловининг ноанъанавий тарзда ўтказилгани иштирокчилар ўртасида болаларга хос хафаланиб қолишга йўл қўймади, деб ўйлайман. Ҳолбуки, ҳар бир жамоа ва уларнинг фаол иштирокчилари ҳам эътибордан четда қолмади. Бари ўзига хос рағбат ва туҳфага эга бўлди, -дейди Республика “Камалак” болалар ташкилоти раиси ўринбосари Дурдона Раҳимова,-  Бу албатта, ҳар бир жамоа аъзосини ҳам, бошланғич ташкилот етакчисини ҳам янада масъулликка, сергакликка, фаолликка ундайди.

Ноанъанавий ва болалар учун янада қизиқарли кечди. Сюрпризларга бой бўлди. Сардорлар ўртасида билимдонлиги ва зукколиги билан ажралиб турган жиззахлик Ферангиз Бахтиёрова:

– Тўғри, кўрик-танловда учлик ғолиблари сафидан ўрин ололмадик. Аммо ўзимиз учун жуда кўп янгиликларни, ташаббусларни кашф этдик. Билим салоҳиятимизни янада оширишимиз, янги ташаббус ва ғоялар яратиш учун кўпроқ изланишимиз лозимлигини уқдик. Жуда кўп дўстлар орттирдик. Манзиллар алмашдик. Бу эса кейинги фаолиятимизни мустаҳкамлаш учун ажойиб имкониятдир,-деди ўз ҳаяжонларини яширолмай.

“Энг намунали  Сардорлар Кенгаши” республика кўрик-танловида “Энг, самый, very” (Бухоро) жамоаси биринчи ўринни эгаллади. “Келажак бунёдкорлари” (Самарқанд) иккинчи ўринга муносиб топилган бўлса,  “Ayden keleshek” (Қорақалпоғистон Республикаси) жамоаси учинчи ўринни қўлга киритди.

Қизғин таассуротларга ҳамда зиёратларга бой тадбир сўнггида ғолиб жамоалар ва барча иштирокчилар диплом, қимматбаҳо совғалар билан тақдирланишди.

Феруза АБДУРАҲМОНОВА,

Зарнигор НАФИДДИНОВА.