Архив за день: 03.06.2024

Istiqlol farzandi

Асрбек Солиев: Ҳаракатланишимнинг янада осонлашиши менга янги режаларни бошлашимга имкон берди!

Жондор тумани Кўлиён маҳалласида яшовчи Солиевлар оиласини маҳалладагилар жуда яхши танишади. Уларнинг оиласида тўрт фарзанд бўлиб, 2001-йилда туғилган кенжа ўғил Асрбек Солиев 2021-йилда чет элда ишлаб юрганида автоҳалокатга учради. Қаттиқ шикастланиш натижасида ўнг оёғидан айрилган йигит оиласининг, бобо-бувисининг руҳий далдаси билан оёққа туриб, яна меҳнат қилишда давом этди. Ҳозирда томорқасида барпо этган иссиқхонада 35 туп лимон кўчатларини парваришлаб, ҳар бир тупдан ўртача 1 млн сўмдан даромад қиляпти.

Асрбекнинг фойдаланиб келаётган протези жуда ноқулай бўлиб, бу унинг иш фаолиятига ҳам салбий таъсир кўрсатар эди. Туман “Инсон” ижтимоий хизматлари марказига мурожаат қилганидан сўнг, соҳа мутахассислари келиб, Асрбекдан ўлчам олишди ва яқинда унга замонавий протез тақдим этилди. Шу билан бир қаторда, “Инсон” маркази томонидан берилган 2 қути асалари билан асаларичилик фаолиятини ҳам бошлади. Бу орада бобоси олиб берган 3 қути асалари билан фаолияти янада кенгайди. Тииниб-тинчимас Асрбек яқинда ёшлар учун 30 йилга фойдаланиш учун бериладиган ер ҳам олиб, ҳозирда дуккакли ўсимликлар экишни мақсад қилган.

– Ногиронлик гуруҳининг белгиланиши, яшашдан, ҳаракатдан тўхташ дегани эмас, – дейди Асрбек. Кимгадир юк бўлмасдан меҳнат қилиш, мақсад сари дадил бориш керак. Тўхтасанг, ўтирасан, ўтирсанг ётиб қолишинг мумкин. Меҳнатни севган одамдан дард ҳам чекинади. Айниқса, янги берилган протез билан юришим, ҳаракатланишим янада осонлашди. Бу эса менга янги режаларни бошлашимга имкон берди.

Jarayon

“Abdulla Qodiriyning yurt qayg’usi haqida bebaho asarlar” kitobi taqdimoti” 

Kitob umr yoʻllarini yorituvchi soʻnmas nur, inson hayotiga mazmun baxsh etuvchi saodat manbai, har qanday vaziyatda ham hamroh boʻluvchi sodiq doʻst. Insonning maʼnaviy kamolotini taʼminlashda kitob singari kuchli qudratga ega vosita yoʻq. Shu bois azal-azaldan maʼrifat peshvolari, ahli donishlar butun insoniyatni kitob oʻqishga, undan ilmu odob sirlarini oʻrganishga chorlab kelishgan. Bugungi kunda mamlakatimizda kitobga va uni oʻqishga eʼtibor ortib bormoqda. Shu jihatdan Oʻzbek adibi A.Qodiriy tavalludining 130 yilligi munosabati bilan “Abdulla Qodiriyning yurt qayg’usi haqida bebaho asarlar” kitobi taqdimoti” mavzusida Buxoro muhandislik-texnologiya instituti Axborot resurs markazida talabalar bilan davra suhbati tashkil etildi. Dastlab, markaz kutubxonachisi Maxsuma Barotova, Maxbuba Teshayeva hamda Shohista Hojiyevalar Abdulla Qodiriy hayoti va ijodi hamda asarlari haqida batafsil ma’lumot berib o’tishdi.

– Abdulla Qodiriy oʻz davrining buyuk adibi bo’lgan qolaversa, hozirgi kunga qadar oʻz asarlari bilan mashhur yozuvchilar qatorida turadi. Uning asarlari bugungi kunga qadar saqlanib qolgan va undagi gʻoyalar bugunning aksi hisoblanadi. Shu uchun qaysi davr bo’lmasin uning asarlarini doim o’qish lozim,- deydi Maxsuma Barotova.

Suhbat oxirida talabalar Qodiriy asarlaridan namunalar o’qib berishdi. Uning qalamiga mansub kitoblar bo’yicha fikrlarini bildirib, o’z mulohazalari aytib o’tishdi.