Бугун ҳунар ўрганиш аёл учун ўз иқтидорини намоён этиш билан бирга, мустақил қадам ташлаш йўлини ҳам беради. Тикувчилик соҳасида кўп йиллик тажриба тўплаган Юлдуз Юнусова ҳам ўз маҳоратини кенгроқ майдонга олиб чиқишга қарор қилди. У 18 йил давомида хонадонида тикувчилик билан шуғулланиб, касбнинг нозик сирларини амалиётда пухта эгаллади. Энди эса унинг меҳнати янги босқичга кўтарилди. Юлдуз Юнусова ўзининг “Yulduz” номли ательесини очиб, касбий фаолиятини кенгайтирди.

Ательеда тикувчилик билан шуғулланиш учун зарур шароитлар яратилган. Бу ерда буюртмаларни сифатли бажариш, янги андозалар устида ишлаш ва касб сирларини ўрганиш учун қулай муҳит мавжуд. Юлдуз Юнусованинг айтишича, у бу корхонани очишни кўп ният қилган. Қолаверса, ательени ташкил этишдан кўзланган мақсад фақат ўз фаолиятини йўлга қўйиш билан чекланмайди. У келгусида хотин-қизларга тикувчиликни ўргатиш, уларнинг касб эгаллашига кўмаклашиш ва меҳнат орқали ўз имкониятларини кенгайтиришларига шароит яратишни истайди. Зеро, қўлида ҳунари бор инсон ўз меҳнатига таяна олади.

Юлдуз Юнусованинг бугунги натижасида устозларининг ҳам муносиб ҳиссаси бор. Унинг тикувчиликдаги устози, “Маржона ателье Бухоро” раҳбари Маржона Мамиева шогирдининг мустақил иш бошлаганидан мамнун. Устози учун шогирдининг ўрганганларини амалда қўллаб, ўз ательесини очганини кўриш катта қувонч. Бу ҳолат ҳунарнинг авлоддан авлодга, устоздан шогирдга ўтиши қанчалар муҳим эканини яна бир бор кўрсатади.

– Шогирдим Юлдуз опа йиллар давомида меҳнат қилиб, тажриба орттирди. Ҳунарни чин дилдан ўрганган шогирднинг ўз йўлини топиши устоз учун катта бахт. Унинг келгусида яна кўплаб аёлларга тикувчиликни ўргатишига ишонаман,- дейди устози.

“Yulduz” ательесининг очилиши бир инсоннинг касбий йўлидаги янги саҳифа сифатида бошланган бўлса, унинг ортида яна бир эзгу ният бор. Бу хотин-қизларнинг ҳунар ўрганиши ва ўз меҳнати билан жамиятда муносиб ўрин эгаллашига ҳисса қўшишдир. Юлдуз Юнусова учун 18 йиллик тажриба энди янги шогирдларга йўл кўрсатадиган мактабга айланиши мумкин.